Psa 24 | KYG | STEP | Ma mopamo Ala kava ne'mo mopamae. Muki ma mopafi'mo hane'niya ya'amo agai'a ya'age'mo hane'niye. Ma mopa'e ma mopafi vaya'e'mo agai'a mopamo hanege agai'a vaya'mo maige hu'nae.

Psalms 24

Ha le konali kini vekae'mo ava gemae

1 Ma mopamo Ala kava ne'mo mopamae. Muki ma mopafi'mo hane'niya ya'amo agai'a ya'age'mo hane'niye. Ma mopa'e ma mopafi vaya'e'mo agai'a mopamo hanege agai'a vaya'mo maige hu'nae. 2 Agaemo ma mopamo solovala ani'mo agotofule'mo alo hu male'niye. Ani'mo agotofule'mo faino ate'niye.

3 Haiya agufa vaya'mogimo Ala kava ne'mo avele'mo afa'a hai'a maigae. Haiya agufa vaya'mogimo aote mono no'afi'mo afa'a fale hai'a maigae. 4 Apayate'mo o'ani'ya'mo ofai'nisiya yaveyave apaipa vaya'mogimae. Afa yatefe'mo mono osuge apago'yamo atalete'a aigofe gemo osuge nehisaya vaya'mogimae. 5 Ala kava ne'mo'a fiku hapa maeno apamigiye. Goti'a apakae apakufamo alino katino ne'apateya vekamo'mo fatago kava'amo alino apamigiye. 6 Alino apamisige'a Yekopu Goti'amo'mo agesayafe'mo kahauya nehae. Kaugosafi'mo kagesayafe'mo kahauya nehae.

7 Yafa lafi kegi'ya kate kitamo yakitapa ateyo. Hanege hanege huno nehaneya mono note kitamo yakitapa ateyo. Yakitapa ategeno'ao ha le konali kini vekamo faleno haineno. 8 Ani ha le konali kini vekamo ina la'ae. Ala kava ne'mo himamu lokiya'a'e vekamae. Ala kava ne'mo'a himamu'aleti'mo kame huno ne'apateya vekamae. 9 Yafa lafi kegi'ya kate kitamo yakitapa ateyo. Hanege hanege huno nehaneya mono note kitamo yakitapa ateyo. Yakitapa ategeno'ao ha le konali kini vekamo faleno haineno. 10 Ani ha le konali kini vekamo ina la'ae. Asole ami vaya'aite'mo yagaino ne'apateya kini vekamo ha le konali kini vekamo mai'niye.